Es ess schun iwwer 2000 Johr her, do hod de Kaiser Augustus beschlosse, in seum Reisch e Volkszählung ze mache. Dess war die allererschd iwwerhaubd; un dorschgefihrd worn es se, wie de Quirinius em Kaiser soin Statthalter in Syrien woar. Awwer die Volkszählung woar oannerschd wie heid; jeder hod nemlisch desweije in die Schdadt geih‘ misse, wu er geborn woar. Woann er misch fregd, ess es em Kaiser nur dorim gange, auszespegguliern, ob all er Steiern bezoahlen orrer irschendwo lewen und sich beim Oiwohnermeldeamt net ogemeldt‘ hän.
Un sou hod sisch aa de Josef aus Nazareth in Galiläa offgerappelt un es lous marschierd ins jüddische Land, genauer gsoad no Bethlehem nunner. Dess woar die Schdadt vum David, un de Josef war jo iwwer zirka 19 Ecke mirrem David verwoandt. Midgenumme hod er aa soi Fraa, die Maria, die wu schwanger war. De Josef hotse iwwrischens immer Marieche gerufe.
Es woar a beschwerlich Reis‘ of dere holbrische Schossee und wie se groad in Bethlehem ookumme seun, do wor’s doann aa schun souweit, dass die Maria rischdisch oig die Weihe kriegd hod. Dodebei han die Zwäi noch goar koa g‘scheit Unnerkunft gfunne. Es oanzische Dach iwerm Kopp hän se inem Vehstall g’funne und dort hod die Maria ern erschde Bu off die Welt gebroocht. Sie hot en in Winnle gewickelt und die Futterkribb woar es erschde Bettsche fers Buusche. Wu hed se’n aa oannerschd heilehe solle? Es war jo näjens Pladz.
In de selwe Gejend woarn aa groad e paar Hirde, die wu noachds ehr Schoof gehied hänn. En Engel vum liewe Godd ess zu dene kumme, un do ess es rischdisch hell um se worn. So ebbes hann se noch nedd erläbd. Un so soin se rischdidisch veschrocke und hänn Oangschd krigd. Awwer de Engel hod doann zu dene gsoad: „Ehr brauchd koa Angschd se hoe! Isch koann eisch woas goanz Dolles vezäihle! Ehr solld eisch rischdisch frahn. Ned bloß ehr, sondern aa es goanze Volk, ja die goanz Welt! Heit es uns nemlisch de Heiland geborn worn. S‘ es de Christus, de Herr, un er ess gebohrn, in de Schdadt vum David. Un oans will isch eisch noch soae: ‚ehr werd des Kind finne. ’s es in Winnle gewiggeld un laid im Stall in den Fudderkribb“.
Un es hod goarned lang gedauerd, do woarn do bei dem oane Engel off oamol noch e goanzi Fussballmannschaft annere Engel, die hänn de liewe Godd gelobd un gsoad:
„Ehre sei em liewe Godd do owwe un Friede off de Erd bei de Mensche vun soim Wohlgefalle.“ Doann soin die goanze Engel wirrer ab un noff in de Himmel.
Die Hirde hänn doann s‘errschd unnernoannern palawert un doann g‘soad: „Aller ab doann, ab no Bethlehem! Mer wollen die Gschischd sehe, wu do bassierd es un vun dere uns der…..mit de Fliejel, …der Engel, groad vezäihld hodd.“
Sou soin se doann aa hordisch no Bethlehem hei un hänn so aa die Zwaa glei gfunne: die Maria un de Josef. Un aa dess kloane Bobbelsche, wu in de Fudderkribb gelähe hodd. Wie se dess gsähe hänn, hänn se glei alle Lait vezäihld, was’n de Engel iwwer des Kind aa schun gsoad hadd. Un all die wu noch kumme soin un dess gehärt hänn, hänn sisch iwwer die Worde vun de Hirde erschd gewunnerd und doann goanz oig gfraaht.
Die Maria awwer, also es Marieche, hod sisch alles gut gemerkt woas gsoaht worn woar, dess hodd se doann aa in ehrm Herz goanz schee offgewihld. Die Hirde awwer soin dodenoh wirrer ford zu ehrne Schoof un hänn de liewe Godd gelobd un gepriese fer all des, was se gehäärd, gsähe un erlebt hann.

21.12.2025 Walter Öhlenschläger